पाब्लो पिकासो

पाब्लो पिकासो बिसौं शताब्दीका सबैभन्दा महान् र सर्वाधिक प्रभावशाली स्पेनिस कलाकार हुन्। बहुमुखी प्रतिभाशाली पिकासो चित्रकार, मूर्तिकार तथा मञ्च सजावटका समेत अद्भुत शिल्पी थिए। उनको कलाकारिताको प्रतिभा जन्मजात थियो।

पिकासोको जन्म सन् १८८१ अक्टोबर २५ मा स्पेनको मलागामा एक मध्यमवर्गीय परिवारमा भएको थियो। जन्मँदा औसत शिशुभन्दा सानो भएकाले नर्सले यो बालक जीवित छैन भन्ने ठानेकी थिइन्, तर उनका काका डन साल्भाडोरले बालक जीवित रहेको सूचित गरेपछि मात्र पिकासोले जीवन प्राप्त गरेका थिए। पिकासोका आमाबुबाको नाम मारियो पिकासो लोपेज र जोसो रुइज ब्लास्को थियो। उनका बुबा जोसो रुइज एक स्थानीय विद्यालयका कुशल कला शिक्षक थिए।

पिकासोले बाल्यकालदेखि नै चित्रकलाको प्रारम्भिक तालिम घरबाटै (बुबाबाट) पाउन सुरु गरेका थिए। १४/१५ वर्षको उमेरमै उनले उत्कृष्ट चित्र बनाउन थालिसकेका थिए। ९ वर्षको हुँदा उनले 'पिकाडोर' नामको आफ्नो पहिलो पेन्टिड चित्र तयार पारे, र १५ वर्षको हुँदा 'कम्युनियन' चित्र पूरा गरे। १३ वर्षको उमेरमा बुबाले चित्रकलाबाट सन्न्यास लिने निर्णय गरेपछि, उच्च शिक्षाका लागि उनलाई स्याड्रिड (माद्रिड) एकेडेमी पठाइयो। तर पिकासो त्यहाँको वातावरणबाट विरक्तिई औपचारिक पढाइ छोडेर पूर्णकालीन रूपमा कलाकारितामै समर्पित भए।

पिकासोले जन्मँदै मृत ठानिनुदेखि सुरु भएको जीवनसङ्घर्ष विभिन्न रूपमा भोगे — आर्थिक तथा पारिवारिक समस्या, सन् १८९५ मा सात वर्षकी बहिनी कोन्चिटाको मृत्यु, 'ब्लु पिरियड' मा देखिएको मानसिक तनाव र आर्थिक सङ्कट, र नाजीहरूबाट जर्मनीमा चित्र प्रदर्शन गर्न रोकिनु जस्ता कठिनाइहरू उनको जीवनमा आए। तथापि उनले निरन्तर मिहिनेत र समर्पणले यी सबै कठिनाइ पार गरे।

पिकासोले सानै उमेरमा आफ्ना बुबाले सिर्जना गरेका सुन्दर कलाकृति देखेर प्रेरणा पाएका थिए। उनकी आमाले भनेकी थिइन् — 'यदि तिमी सिपाही बन्यौ भने जनरल हुने छौ, धर्मगुरु बन्यौ भने पोप हुने छौ' — तर पिकासो आमाले भनेभन्दा फरक क्षेत्रमा गए र त्यसैमा अत्यन्त लगनशील भई विश्वप्रसिद्ध कलाकार बने। यसबाट उचित अवसर र लगनशीलताले जुनसुकै क्षेत्रमा पनि उत्कृष्टता हासिल गर्न सकिन्छ भन्ने प्रेरणा पाइन्छ।

पिकासोको जीवनीले सिकाउँछ — हरेक बालबालिकामा विशिष्ट सिर्जनाशक्ति र प्रतिभा हुन्छ; उचित अवसर, निरन्तर मिहिनेत र लगनशीलताले जीवनका कठिनाइ पार गरी महान् उपलब्धि हासिल गर्न सकिन्छ, र त्यसले संसारलाई पनि उज्यालो बनाउन सक्छ। साथै, हिंसाभन्दा कला र सिर्जनाले समाजमा बढी दिगो र सकारात्मक परिवर्तन ल्याउन सक्छ भन्ने सन्देश पनि यसबाट पाइन्छ।